'கான்' பர்ஸ்ட் லுக் வரவேற்பு. சந்தோஷத்தில் சிம்பு!

சென்னை: கான் பட பர்ஸ்ட் லுக்கிற்கு ரசிகர்களிடையே கிடைத்துள்ள வரவேற்பால் சூப்பர் ஹேப்பியாக இருக்கிறாராம் சிம்பு. தனது ரசிகர்களுக்கு அவர் ஸ்பெஷல் தேங்க்ஸ் ஒன்றையும் கூறியுள்ளார்.

கிட்டத்தட்ட இரண்டாண்டுகளாக சிம்புவின் படம் எதுவும் ரிலீசாகவில்லை. வாலு, வேட்டை மன்னன், இது நம்ம ஆளு என தொடர்ந்து அவரது படங்கள் அனைத்தும் ரிலீஸ் ஆகாமல் கிடப்பில் கிடக்கின்றன. இந்நிலையில், சமீபத்தில் கௌதம்மேனனுடன் ஒரு படம், செல்வராகவனுடன் ஒரு படம் என புதிய படங்களில் நடிக்கத் தொடங்கினார் சிம்பு.

வழக்கமாக சிம்புவும் சரி, செல்வராகவனும் சரி வேலையை மெதுவாக இழுத்தடித்து படப்பிடிப்பை தாமதமாக்குவார்கள் என்ற குற்றச்சாட்டு கூறப்படுவதுண்டு. ஆனால், அதனைப் பொய்யாக்கி இப்புதிய படவேலைகளில் இருவரும் ஜெட் வேகத்தில் செயல்பட்டனர்.

இப்படத்திற்கு கான் எனப் பெயரிடப் பட்டது. கான் என்றால் காடு என்று பொருள். இந்தப் படத்தில் சிம்பு ஜோடியாக மெட்ராஸ் பட நாயகி கேத்ரீன் தெரஸா மற்றும் டாப்ஸி நடிக்கின்றனர்.

கான் படத்தின் பர்ஸ்ட் லுக் நேற்று வெளியானது. சிம்பு இப்படத்தில் முருக பக்தராக நடிப்பதாகக் கூறப்படுகிறது. அதனை உண்மை என மெய்ப்பிப்பது போல, நெற்றியில் விபூதி பட்டை போட்டு, கழுத்தில் ருத்ராட்ச கொட்டை அணிந்து கைகளைக் கூப்பியவாறு சிம்பு நிற்பது போன்ற போஸ்டர் வெளியானது.

வெளியான சிறிது நேரத்திலேயே கான் பர்ஸ்ட் லுக் ட்விட்டரில் இந்திய அளவில் டிரெண்ட் ஆனது. ஃபர்ஸ்ட் லுக் போஸ்டர் மிகவும் வித்தியாசமாக உள்ளது என்று பலரும் இதற்குக் கருத்து தெரிவித்து வருகின்றனர்.

தொடர்ந்து தனது கான் பர்ஸ்ட் லுக் போஸ்டருக்கு ரசிகர்கள் தரும் ஆதரவால் சிம்பு மகிழ்ச்சி அடைந்துள்ளார். தனது மகிழ்ச்சியை அவர் தனது டுவிட்டர் பக்கத்தில் வெளிப்படுத்தியுள்ளார்.

Share

& Comment

Tweet